‹La muntogna dals 1000 privels› è in cudesch d’aventura che sa drizza ad uffants e giuvenils (a partir da 10 onns). Ma attenziun: tgi che vul sa tschentar patgific sin la pultruna e be guardar tiers dalunsch co ch’ils protagonists sa dostan, fa meglier da laschar la detta da questa lectura!
Il cudesch cumenza cun in’admoniziun che fa prest schelar il sang en las avainas: «Ti stos esser fitg precaut!! L’ascensiun d’ina muntogna da 6000 meters po esser fitg privlusa. Fa tes patratgs avant che ti ta decidas. I na dat nagina via enavos! Il territori, en il qual ti ta movas, è plain privels: burascas da naiv, lavinas, sfendaglias da glatschers e bler auter. Tia expediziun vegn ad esser difficila. Tia survivenza – e la pussaivladad da puspè vesair tia famiglia – vegn a depender da tes saun giudizi.»
E pelvaira: Tar ‹La muntogna dals 1000 privels› na sa tracti betg d’in cudesch ch’ins legia en ina giada da l’entschatta a la fin. El cuntegna numnadamain bleras differentas aventuras ed eveniments che pon capitar durant l’ascensiun dal Diupathan. Da temp en temp ha il lectur da tscherner tranter differentas pussaivladads. Suenter esser sa decidì per ina via, suonda el las indicaziuns per vesair, tge che capita. Forsa cuntinuescha il viadi vers il piz da la muntogna – e forsa ch’el dat en in precipizi, vegn giud via u frunta sin autras difficultads che dumondan suenter novas decisiuns. Qua in exempel:
«Baud il suentermezdi cuntanschas ti il glatscher cun sias sfessas perfidas. Per fortuna èn vegnidas messas stgalas d’aluminium sur las sfessas las pli privlusas, per ch’ils alpinists possian ballantschar suravi. Ma igl è anc adina ordvart spinus, stos ti constatar, cura che ti stas davant ina sfessa lada e spezialmain profunda. La radiaziun intensiva dal sulegl ha luentà liber in bun toc ils crutschs da glatsch, cun ils quals las fins da la stgala èn segiradas en il glatsch. Tgi sa, sche la stgala tegna ussa anc tes pais – u sch’ella sa distatga e ruschna en la sfessa ensemen cun tai?»
L’autur tudestg Fabian Lenk (* 1963) è schurnalist ed autur da romans criminals per creschids e per uffants. Enconuschent è el surtut per sias serias da cudeschs d’uffants, sco per exempel ‹Das Schülergericht›, ‹Tatort Geschichte›, ‹Die Zeitdetektive›, ‹Dino Terra›, ‹Die Schatzjäger› u ‹Heisse Spur›. Er ‹La muntogna dals 1000 privels› fa part d’ina seria. Quella sa cloma ‹1000 Gefahren› e cumpiglia en il fratemp radund 20 toms che mainan il lectur en il desert ed en l’univers, sin chastels ed en piramidas, sin bastiments da pirats ed en taunas da draguns. E mintga tom stat sut il motto «Ti decidas!» e fa uschia dal lectur in protagonist ch’è confruntà cun decisiuns en las qualas i po ir per vita e mort…
| Indicaziuns bibliograficas Autur(a): Fabian Lenk Titel: La muntogna dals 1000 privels Chasa editura: Lia Rumantscha (Ravensburger) Onn da publicaziun: 2007 Dumber da segns: ca. 72 000 (116 p.) Links Preschentaziun Visualisaziun dal cuntegn Cumprar Emprestar |
MAGLIACUDESCHS 
