Quest cudesch, scrit ed illustrà cun in umor ordvart fin, cuntegna ils raquints ‹Mia sora Clara e las mieurs alvas›, ‹La fiera da rauba veglia›, ‹Co che jau e Clara avain cumprà frajas›. Cun sias letras grondas è el adattà spezialmain bain sco emprima lectura u er per preleger.
En in interval da bundant diesch onns ha l’Uniun Rumantsch Grischun edì a partir dal 1992 in’entira retscha da cudeschs: Per uffants èn quai stadas las publicaziuns ‹Mes emprim cudesch da pleds› (1992), ‹Mia sora Clara e las mieurs alvas› (1994), ‹Atlas illustrà dals animals› (1995) e la retscha ‹Egls averts› cun ‹Mammals› (1999), ‹Amfibis› (2000), ‹Futur› (2000), ‹Utschels (2001) e ‹Flurs› (2003); per giuvenils ils crimis da Sherlock Holmes ‹Il bindel taclà / Il circul cotschen› (1994) e ‹Peder Nair / La lia dals chaus cotschens› (1996) sco er il cudesch ‹Aids – protegia tai per mai› da Niki de Saint Phalle (1996); e per creschids ‹Las giaglinas pensadras› (1992) e ‹La chasa gronda ed autras raquintaziuns› (1992).
Tar il cudesch ‹Mia sora Clara e las mieurs alvas› sa tracti d’in dals 37 toms or da la retscha da cudeschs d’uffants ‹Jau e mia sora Clara› da l’autur Dimiter Inkiow cun illustraziuns da Fritz Goller. Ils cudeschs cuntegnan per gronda part istorgias curtas davart ils fragliuns Clara e ses frar pli giuven Clà. Tut las istorgias vegnan raquintadas or da la perspectiva dal giuven; sia moda da raquintar uffantila-naiva dat in scharm tut spezial als raquints. I sa tracta da situaziuns, en las qualas ins po tgunsch vegnir, e da chaussas che uffants fan gugent, ma che èn scumandadas. E mintgatant èn las istorgias er simplamain be da rir. Er la morala na vegn betg a la curta: savens realiseschan ils uffants sezs che lur pass è stà fallà ed els emprovan da metter sezs en urden il virivari ch’els han chaschunà.
La pli lunga da las trais istorgias cuntegnidas en il cudesch rumantsch tracta da las aventuras da Clà e Clara cun las mieurs alvas. Suenter che mintgin dals uffants ha survegnì ina mieur, na vai betg ditg che quellas survegnan pitschens. Ed ussa stattan ils uffants avant la sfida da vegnir da vender ina part da las mieurettas…
«Betg olma che telefona. Ni quel di ni il di che vegn. ‹Clara, jau crai che nagin na veglia cumprar nossas mieurs.› ‹Forsa èn ellas memia charas›, manegia mia sora Clara. ‹Nus sbassain il pretsch.› Ella va immediat giun via, stritga ‹3 francs› e scriva suravi ‹2 francs›. Nagin che s’annunzia. Lura spetgain nus anc in di. La finala decidain nus da sbassar il pretsch anc ina giada. Clara stritga ‹2 francs› e scriva suravi ‹1 franc›. Ma anc adina nagin che s’annunzia. Quai grittenta nus. Perquai che las mieurs vegnan pli e pli grondas, stuess ins, suenter tant temp, schizunt pudair vender quellas per in pretsch pli aut.»
L’autur Dimiter Inkiow (1932–2006) è oriund da la Bulgaria. Suenter esser vegnì en conflict cun la regenza pervi d’ina cumedia ha el stuì bandunar il pajais l’onn 1965. Sco fugitiv politic ha el vivì en Germania, nua ch’el ha cuntinuà sia carriera sco scriptur. Dad el èn cumparids bundant 100 cudeschs d’uffants ch’èn vegnids translatads en 25 linguas.
| Indicaziuns bibliograficas Autur(a): Dimiter Inkiow (cun illustraziuns da Fritz Goller) Titel: Mia sora Clara e las mieurs alvas Chasa editura: Uniun Rumantsch Grischun Onn da publicaziun: 1994 Dumber da segns: ca. 25 000 (84 p.) Links Preschentaziun dal cudesch Cumprar Emprestar Unitads didacticas |
MAGLIACUDESCHS 
