Il cudesch ‹Hallo, pumpiers!› ha la Federaziun dals pumpiers da la Svizra Orientala edì il 2016. Sco ch’i resorta gia da la cuverta, sa tracti d’in cudesch per ‹engiavinar, leger, dissegnar e scuvrir›. Il cudesch regalan ils pumpiers locals als uffants a chaschun da lur visitas en scola.
En il comic ‹Nagin n’è memia pitschen per gidar!› vegn ins a savair tge far cur ch’i brischa: avertir tut las persunas, serrar ils ischs cura ch’ins banduna l’edifizi, alarmar ils pumpiers e sa rimnar al lieu da reuniun. E gea betg vulair entrar en ina stanza da la quala sorta fim, pertge che fim è tissi! Sulettamain ils pumpiers, munids cun il dretg equipament, pon trair flad en il fim.
Sin las proximas paginas, entituladas ‹In chaun mirveglius›, accumpogna il chaun Flo ils pumpiers. Ins vegn a savair tge colurs ch’ils autos da pumpiers han, cun tge apparats ch’è munì in auto-cisterna e da tge ulteriur equipagi ch’ils pumpiers disponan (vestgadira da protecziun, apparats da respiraziun etc.).
Alura èn ils uffants dumandads da schliar in gieu da labirint. Cun agid da quel vegnan resumadas las incumbensas principalas dals pumpiers che cumpiglian bundant dapli ch’il servetsch da stizzar fieus:
«Salvar e proteger signifitga gidar en differents cas d’urgenza. Sch’in uman u in animal è en las stretgas, sch’i brischa, sch’i dat in accident cun chemia, cun gas u cun ieli, sch’ina via è bloccada u inundada suenter ina malaura, vegnan adina ils pumpiers en agid.»
En la part centrala dal cudesch suonda in gieu d’aventura da volver ora. Ils giugaders legian mintgamai il text e tschernan tranter duas pussaivladads co che l’istorgia pudess cuntinuar per Flo. Uschia suondan els la via da text a text, da lieu a lieu, da decisiun a decisiun e mainan Flo directamain a sia finamira sisum l’auto-stgala.
Uss èn dumandadas las abilitads manualas: sin las paginas 20/21 pon ins crear ina carta popup che mussa il post da pumpiers pront per il proxim cas urgent. E dal reminent sa chatta davos la cuverta dal cudesch in’agiunta che pussibilitescha da zambregiar dus autos da pumpiers!
Alura suonda in text pli lung che tracta la tematica d’alarm d’ieli – sco adina puspè cun il chaun Flo, il qual fa qua da veritabel detectiv. Ed il comic ‹Anniversari en las muntognas› (p. 24–28) sensibilisesch er uffants pli gronds e giuvenils d’ir enturn precaut cun fieu en la natira ed a chasa.
La fin dal cudesch porscha spazi per illustrar atgnas experientschas, preschenta las soluziuns e respostas tar tut ils quizs e gieus dal cudesch e lascha anc entrar ina giada en acziun Flo a moda divertenta.
Uschia va a fin quest gir tras il mund dals pumpiers, sin il qual las lecturas ed ils lecturs vegnan accumpagnads dals trais amis Nino Fontana, Alex Berger e Flurina Rauch – e sa chapescha dal chaun Flo. La publicaziun porscha pelvaira in mix reussì tranter divertiment ed instrucziun. E la finala vul il cudesch er contribuir a recrutar la proxima generaziun da pumpiers: «Mattettas e mattets pon far part dals pumpiers giuvens. Telefona al cumandant da tes pumpiers per vegnir a savair dapli! Ils pumpiers giuvens sa legran sin tai!»
| Indicaziuns bibliograficas Autur(a): Diego Balli, Frida Bünzli Titel: Hallo, pumpiers! Engiavinar, leger, dissegnar, scuvrir Onn da publicaziun: 2016 Dumber da segns: 6000 Links Emprestar Prevenziun e cumportament en cas d’incendi |
MAGLIACUDESCHS 
