Il plevon gesuit e magister spiritual Anthony de Mello (1931–1987) è stà activ en ses pajais nativ, l’India, ed en ils Stadis Unids. Cun sias sabientschas e sentenzas tant spiertusas sco umoristicas ha el pledentà in public mundial, e quai lunsch sur ils cunfins da la cretta cristiana ora.
Scriver texts religius dals quals ins na s’accorscha betg il cuntegn religius? E scriver texts betg religius che pudessan star en la Bibla? Quai è stà la spezialitad dad Anthony de Mello. L’autur ha sviluppà in fin sensori per las dumondas centralas da la vita che pertutgan tut ils umans, independent da lur cretta, da lur cultura, da lur ambient social. Ma cuntrari ad auters auturs na sa stenta de Mello betg forsa da dar a sia sabientscha ina cumparsa uschè neutrala u nuncristiana sco pussaivel. Il cuntrari: En la gronda part da sias istorgettas vegn discurrì explicitamain da Jesus, dal Dieu dals cristians u fatg allusiun a cuntegns u rituals dal cristianissem. Ma igl è il stil, la moda e maniera co che Mello s’avischina a las tematicas ch’al auzan lunsch sur mintga bigottaria e che rendan ses texts tuttina interessants tant per il fervent cristian sco er per l’aderent d’in’autra religiun, per l’agnosticher e per l’ateist.
Quai resorta per exempel da la moda e maniera co che Jesus Cristus cumpara en ils texts dad Anthony de Mello: Quest Jesus n’è nagina divinitad sacrosancta ed auzada lunsch sur tutta realitad terrestra. El è in uman or da charn ed ossa, in cumpogn, in furbaz, magari malinschignaivel, magari naiv. La morala dal raquint na vegn betg giu da tschiel, mabain or da situaziuns dal mintgadi e d’ina persuna che stat cun omadus pes sin terra. Ins al pudess magari cumparegliar cun Nasrudin, la famusa figura comica da l’Orient. En omadus cas sorta ina profunda sabientscha d’ina situaziun nunspetgada, savens comica, ma adina liada als umans e lur quitads e giavischs.
En il pitschen raquint ‹Jesus al matsch da ballape› sbragia Jesus tar mintga gol, independentamain da la squadra ch’al ha gist fatg. Ils aspectaturs che sesan davos el reageschan sin quai cun nunchapientscha. En il discurs che sa sviluppa alura tranter Jesus e ses accumpagnaders di el ch’er persunas religiusas hajan savens la tendenza da sa serrar envers posiziuns divergentas: «Els paran adina da vulair crair che Dieu saja da lur vart ed encunter la glieud da l’autra partida.» Sinaquai cuntinuescha Jesus:
«Perquai na ma fixesch jau mai sin religiuns, jau ma fixesch sin umans. Umans èn pli impurtants che religiuns. L’uman è pli impurtant ch’il sabat.»
«Ti duessas metter tes pleds sin la stadaira», ha in da nus ditg in pau preoccupà. «Ti es gia vegnì crucifitgà ina giada pervi d’ina tala chaussa.»
«Gea – e quai da glieud pietusa», ha Jesus respundì cun in surrir turmentant.
Quest pitschen insatg mussa gia co e daco che Anthony de Mello ha merità ses renum da preschentar «las sabientschas dal mund, concentradas sco sut ina marella: experientschas da vita anticas e modernas, da l’Occident e da l’Orient».
| Indicaziuns bibliograficas Autur(a): Anthony de Mello Titel: Sabientschas e sentenzas Onn da publicaziun: 1998 (LQ) / 2011 (e-book) Dumber da segns: 13 700 Links Telechargiar sco e-book |
MAGLIACUDESCHS 
