Las aventuras da Tintin vegnan raquintadas en var 30 linguas. En l’emprim dals dus toms rumantschs, cumparids l’onn 1986, persequitescha Tintin ina banda da falsifitgaders da daners fin en Scozia ed emprova da schliar il misteri da la bestia dal chastè da Ben More.
L’autur dals cudeschs da Tintin è stà Georges Prosper Remi (1907–1983). Ses num d’artist Hergé (pronunzià [ɛʁʒe]) deriva da sias inizialas vieutas, RG, pronunziadas en franzos. Dal reminent ina coincidenza remartgabla: Da RG deriva in dals emprims comics ch’èn vegnids publitgads en rg… (suenter ‹Asterix ed ils Helvets› l’onn 1984).
Hergé è naschì e mort en Belgia, en vischinanza da Brüssel. Vi da ‹Les aventures de Tintin›, sia seria da comics la pli famusa, ha el lavurà davent da l’onn 1929 fin sia mort. En tut èn cumparids 24 toms. Hergé segna tant sco autur sco er sco illustratur da la seria.
Il tom ‹L’Insla naira› è cumparì en la versiun originala il 1937 (en alv e nair) resp. 1943/1965 (emprima e segunda ediziun en colur). Mintga giada ha l’autur dissegnà cumplettamain da nov l’entir’ediziun (ed adattà pitschens detagls). La versiun rumantscha sa basa sin l’ediziun dal 1965.
Il cuntegn dal tom sa lascha resumar sco suonda: Cura che Tintin vul vegnir en agid ad in aviun ch’ha stuì atterrar per forza, sajettan ils dus pilots sin el. Tge ha quai da muntar? Tintin persequitescha ils fastizs da l’aviun misterius sur il Chanal da la Mongia fin en l’Engalterra e vegn sin ils fastizs d’ina banda da falsifitgaders da munaida. En ina ruina da chastè sombra sin l’Insla naira sto el la finala batter cunter in terribel monster.
Inspiraziun ha Hergé chattà per l’ina en il film ‹The 39 Steps› dad Alfred Hitchcock (1935), per l’autra è il monster inspirà per part dal film da Hollywood ‹King Kong› dal 1933. En egl dat ultra da quai che la televisiun cumpara en il comic – in’innovaziun tecnica ch’era vegnida introducida en la Gronda Britannia pir in onn avant l’emprima ediziun da l’‹Insla naira›.
| Indicaziuns bibliograficas Autur(a): Hergé Titel: L’Insla naira (Las aventuras da Tintin) Onn da publicaziun: 1986 Links Cumprar Emprestar |
MAGLIACUDESCHS 
