La structura da la baselgia catolica

Cun passa ina milliarda cartents è la baselgia catolic-romana la pli gronda organisaziun dal mund. Ella è structurada tenor in sistem dual: Ins distingua tranter la baselgia universala cun sedia a Roma e las baselgias localas cun structuras che sa differenzieschan d’in pajais a l’auter.

SGUARD A L’INTERN

Il cudesch ch’è illustrà ritgamain sa cumpona da duas parts: ‹La structura da la baselgia catolica› e ‹Glossari›. En l’emprima part – ch’ha in caracter introductiv – vegnan tematisads en quatter sutchapitels ils suandants aspects: ‹La cuminanza dals cristians›, ‹Las differentas confessiuns›, ‹La baselgia catolica›, ‹Il sistem dual›. Da quest ultim chapitel resorta la cumplexitad da la structura da la baselgia sco ch’ella sa preschenta gist er en noss pajais:

«Uschia enconuscha la baselgia en Svizra duas structuras. D’ina vart quella dal dretg canonic che regla las chaussas internas da la baselgia; da l’autra vart quella dal dretg statal che regla las chaussas ‹mundanas› da la baselgia, sco per sumeglia incassar las taglias, administrar ils bains da las plaivs u da las diocesas. Questas duas structuras sa cuntradin vicendaivlamain. Entant ch’il dretg canonic è in dretg che vala sin l’entir mund catolic ed è structurà a moda ierarchica, sa tracti tar il dretg statal en Svizra d’in dretg primarmain communal e democratic.»

Tant a la structura generala da la baselgia universala sco er a la situaziun specifica en Svizra sa referescha er la segunda part dal cudesch, il Glossari. En quel vegnan approfundads bunamain 50 terms, sin ils quals ins frunta adina puspè en publicaziuns ed en las medias, ma ils quals i n’èn betg adina simpels da definir u da tegnair in ord l’auter. Qua furma il glossari in bun agid d’orientaziun, e quai tant areguard l’organisaziun centrala da la baselgia (ierarchia, uffizis e titels, organisaziuns) sco er areguard la structura a la basa ed ils sacraments da la baselgia.

Tut en tut sa tracti dals suandants terms (che cumparan en la publicaziun betg en successiun tematica, mabain – sco che quai è per ordinari il cas tar in glossari – en urden alfabetic: Archuvestg, archuvestgieu, baselgia, Baselgia catolica ed apostolica, baselgia chantunala, batten, beatificaziun, canoni, cardinal, chapitel catedral, chaplon, concil, conclave, concordat, Conferenza centrala catolica romana da la Svizra, Conferenza dals uvestgs / conferenza episcopala, craisma, curia romana, decan, decanat, diacon, dogma, enciclica, eucaristia, guardia svizra, lètg, nunzi apostolic, ordinarius, ordinaziun, papa, penetienza, plevon, plaivs / cumin-baselgia, prelat, prelatura persunala, provinza ecclesiastica, sacraments, Sontga Sedia, sinoda, Scola auta da teologia Cuira, Seminari da spirituals son Gliezi, uncziun, uvestg, uvestg auxiliar, uvestgieu / diocesa, Vatican, vicari episcopal, vicari general.

Indicaziuns bibliograficas
Autur(a): RTR
Titel: La structura da la baselgia catolica
Onn da publicaziun: 2016 (e-book)
Dumber da segns: 28 700

 
Links
Telechargiar sco e-book
Dossier tematic