Wendelin, il nov conscolar da Kwiatkowski, è snuaivel perdert e pront da gidar tuts, ma el è pitschen ed in pau grasslut e vegn tentà da quatter camarats da scola. Per fortuna al gida noss detectiv – ensemen tendan els als malfatschents la pli dultscha trapla ch’ins po s’imaginar.
«Mintga bun detectiv ha ses tics. In na prenda mai giu ses chapè, gnanc en letg, in auter desista da la pistola, ma betg da ses lollipop, ed anc in auter dovra tantas peruccas e barbas faussas ch’el na sa mintgatant sez gnanc tgi ch’el è. Mes tic èn schlogns da Carpenter’s che jau schlogn quasi permanentamain. E mia chapitscha prend jau er giu be en cas urgents, per exempel sut la duscha u tar il coiffeur. I dat glieud che fa beffa da quai. Duain els be far. Jau dovr mes schlogns preferids numnadamain per pensar. E mia chapitscha cun si in grond ‹K› procura per la temperatura necessaria per che mes tscharvè possia funcziunar.»
Il cudesch è cumparì oriundamain il 2010 sut il titel ‹Rache ist Schokotorte›. Igl è quai stà gia il 20avel tom en la retscha da l’autur tudestg Jürgen Banscherus ‹Ein Fall für Kwiatkwoski›. Al success attribuescha segiramain il tun umoristic-divertent che resorta gia da la passascha introductiva e che sa tira en la medema furma tras l’entira retscha. Las illustraziuns da Ralf Butschkow contribueschan da lur vart a dar al giuven detectiv il scharm dal furbaz simpatic.
La versiun rumantscha dal cudesch ha l’Uniun Rumantsch Grischun edì il 2012. In onn pli tard è suandà in ulteriur tom or da la retscha ‹In cas per Kwiatkowski›, numnadamain ‹Monsters, tschalers sco taunas e pulvra antichamulaunas›. Sto esser che las lecturas ed ils lecturs apprezieschan istorgias criminalas – quai na para d’esser en terra rumantscha betg auter ch’utrò. Uschia na fai betg surstar ch’igl è gia cumparì in bel dumber da crimis er en rumantsch grischun:
Per l’ina èn quai – en ina lingua in pau simplifitgada, adattada per giuvenils – ils dus cudeschs cun istorgias da Sherlock Holmes che l’Uniun Rumantsch Grischun ha edì ils onns 1994 (‹Il bindel taclà› / ‹Il circul cotschen›) e 1996 (‹Peder Nair› / ‹La Lia dals chaus cotschens›). Alura or da la retscha OSL (Ovra Svizra da Lectura per la Giuventetgna) ‹La figura naira› da l’autura svizra Sabina Altermatt. E per creschids ils dus crimis scrits en rumantsch grischun ‹Fieu e flomma› da Flurin Spescha (1993) e ‹Gulasch en schelentera› da Claudia Cadruvi (2008). Claudia Cadruvi ha er scrit dus crimis per uffants, che tractan las aventuras dals fragliuns Julia, Lezi e Laina, numnadamain ‹Capuns ed il stgazi dals Franzos› (2003) ed ‹Omlettas e la battaglia da Lepanto› (2013). En rom da l’elavuraziun dals meds da scola en rumantsch grischun ha Susan Rupp plinavant scrit ‹In chasti cun consequenzas› (2011), in crimi per uffants dal stgalim mesaun ch’è en il fratemp er accessibel sco cudesch digital.
Daspera meritan er menziun ils crimis en furma da comic, numnadamain ils dus toms da Tintin (‹L’insla naira› ed ‹Il giomberet cun las forschs d’aur›, omadus 1986), ‹Il stgazi da la Delfina› – in comic or da la retscha Ils conquistaders dal tschiel da Franz Zumstein (2004) – sco er ‹Ils ertavels da la serp› (1998) ed ‹Il misteri alv› (2002), dus comics che tractan l’istorgia pli nova da la Svizra resp. da la Chasa federala en furma da crimi.
| Indicaziuns bibliograficas Autur(a): Jürgen Banscherus Titel: Turta da tschigulatta per vendetga (or da la retscha In cas per Kwiatkowski) Onn da publicaziun: 2012 Dumber da segns: ca. 28 000 Links Preschentaziun Cumprar Emprestar |
MAGLIACUDESCHS 
