Il raquint ‹In chasti cun consequenzas› da Susan Rupp è cumparì il 2011 sco part dal med da scola ‹Splerins› per la 5avla classa. Dapi il 2015 è il text er accessibel en furma digitala, uschia che las aventuras dals scolars da Marolas sa laschan persequitar independentamain dal med da scola.
«Cun passins e passuns, sur puntinas e munts, alerts per la nova scuverta. Sco splerins tras sgurdins, vi e nà, qua e là, siador cun egliada averta.» Ils onns 2007 fin 2015 è cumparida l’emprima generaziun da meds d’instrucziun da lingua en rumantsch grischun. Ils titels dals singuls meds, che cuvran tut ils nov onns da la scola populara, furman pleds che derivan da la poesia allegada.
A partir da la tschintgavla classa cuntegna il med mintgamai ina lectura pli lunga. Per la tschintgavla e sisavla classa ha Susan Rupp creà duas aventuras che sa splegan en il vitg rumantsch fictiv Marolas: ‹In chasti cun consequenzas› (‹Splerins›, 5avla classa) e ‹Born to be wild› (‹Sgurdins›, 6avla classa). Per il stgalim superiur ha Chatrina Josty scrit ‹Il di che Cindy è svanida› (‹Vi e nà›, 7avla classa) e ‹Tartuffels en tschaler› (‹Qua e là›, 8avla classa). Per il med da la 9avla classa (‹Siador›) è alura suandà in text litterar sco cudesch separat (‹In nivel per cumià› da l’autura beltga Katrien Seynaeve).
Dals texts da Susan Rupp e da Chatrina Josy (5avla fin 8avla classa) è mintgamai agiuntada al med da scola ina versiun auditiva sin disc cumpact. Percunter èn ils texts sco tals per part sparpagliads in pau en ils cudeschs dals scolars, ils carnets da lavur ed ils commentaris dals magisters. Tant meglier ch’igl è stà pussaivel a chattà.ch – cun consentiment da la chasa editura per meds d’instrucziun – da metter a disposiziun ils texts integrals en furma da cudeschs digitals.
En il raquint ‹In chasti cun consequenzas› arriva in nov scolar en il vitg, Robin. El e sias conscolaras e conscolars da la 5avla classa sa chattan tut nunspetgadamain entamez in veritabel crimi:
Ils uffants guardan in l’auter cun egls gronds. Els èn conscients d’esser serrads en cun dus laders armads en ina chasa abandunada dador Marolas durant ina navaglia. Andri scutina: «Uss fiss jau schizunt pli gugent en stanza da scola tar signur Valentin cun sias lezias da mate cumplitgadas…» Cura ch’els audan puspè il riez or da la cuschina, profita Curdin per declerar sut vusch: «Nus stuain immediat bandunar la chasa senza ch’els ans percorschian.»
Ils titels dals singuls chapitels duain dar in’emprima impressiun dal cuntegn dal cudesch: ‹In nov dachasa e novs conscolars›, ‹Encreschadetgna ed in e-mail›, ‹Ina buna vista›, ‹Ina chasa abandunada›, ‹Fortuna u disfortuna?›, ‹Explorond la chasa dals spierts›, ‹Ina guerra da pulvra, ina lumparia e la tschertga da zups›, ‹Dus umens en chasa›, ‹In plan per fugir›, ‹Segirar cumprovas›, ‹In stgazi en tschaler ed ina figura naira en il guaud›, ‹Tut quai è propi vair!›, ‹Nagins spierts. U forsa tuttina?›. Mirveglias tge che sa zuppa tut davos quests titels? Cun in clic sin il link giudim questa pagina s’avra il cudesch digital e porscha lectura captivanta per mintga fan da crimis…
L’autura Susan Rupp ha studegià a l’Universitad da Turitg litteratura e linguistica tudestga e culturas popularas. Dapi lura è ella engaschada sco redactura dal ‹Sarganserländer› e lavura sco autura libra (p.ex. gieu al liber ‹Oh Tavanasa› 2015).
| Indicaziuns bibliograficas Autur(a): Susan Rupp Titel: In chasti cun consequenzas Onn da publicaziun: 2011 (Splerins) / 2015 (e-book) Dumber da segns: 53 300 Links Telechargiar sco e-book |
MAGLIACUDESCHS 
