Temp da guerra ed onns da boom, dumondas socialas ed ecologicas, la sfida da la globalisaziun… Il cudesch ‹La Svizra en transfurmaziun› preschenta l’istorgia dal pajais dals onns 1930 fin l’entschatta dal 21avel tschientaner – a moda cumpacta e tuttina en ina varietad tematica surprendenta.
La SRG SSR è vegnida fundada il 1931. Dapi lura han las quatter unitads linguisticas da radio e televisiun archivà in grond stgazi da documents da tun e maletg. Per il giubileum da 75, l’onn 2006, ha la SRG SSR realisà in portal online cun l’intent da render accessiblas truvaglias or da quest fundus (www.ideesuisse.ch/timeline). Sin la pagina han ins ordinà ils documents audiovisuals tenor temas e structura ils dossiers en nov rubricas: ‹Vita politica svizra, ‹La Svizra en il mund›, ‹Debattas publicas›, ‹Moviments da protesta›, ‹Vita da mintgadi›, ‹Cultura e munds d’ideas›, ‹Sport e temp liber›, ‹Furmaziun e perscrutaziun› ed ‹Economia ed infrastructura›.
En il decurs dal 2018 han ins prendì la pagina da la rait. Per tegnair quint dal svilup rasant en il mund da medias è er la SRG SSR dumandada da reponderar cuntinuadamain sias purschidas online e d’adattar quellas al cumportament medial dals utilisaders. Ina part dals cuntegns han ins integrà en mySchool, il portal da la SRG SSR per las scolas, sut il titel ‹Die Schweiz im Wandel› (da là er il titel da l’e-book che vegn preschentà qua). Las autras contribuziuns en sun e tun èn en tutta cas conservadas en ils archivs e stattan a disposiziun per eventuals projects futurs en novs formats.
Tge ch’ans interessescha qua è però in product apparentamain lateral dal portal Timeline, numnadamain ils texts introductivs ch’eran vegnids creads tar mintga dossier. Quels cuvran in vast spectrum da tematicas e porschan uschia, rimnads ed edids a moda cumpacta en furma dad e-book, in’istorgia da la Svizra davent dals onns 1930 fin l’entschatta dal 20avel tschientaner. I sa tracta da texts da qualitad – redigids per part a basa d’artitgels dal Lexicon istoric da la Svizra – che ‹funcziuneschan› perfetgamain er senza ils cuntegns audiovisuals ch’els duevan oriundamain ‹embellir›.
Il spectrum da las tematicas che vegnan tractadas è pelvaira surprendent e tegna quint a la pretensiun d’ina istoriografia moderna che tracta a moda eguala tematicas politicas, socialas e da la vita da mintgadi. Qua intgins exempels: ‹L’affera da fischas›, ‹Il bloc da l’ost e la tenda da fier›, ‹La debatta nucleara›, ‹La giuventetgna sa revoltescha›, ‹AIDS›, ‹L’immigraziun taliana›, ‹Las exposiziuns naziunalas›, ‹Ski – il sport naziunal›.
Adina puspè fan ils singuls chapitels er la punt al context europeic e global. Gist per in’istorgia che s’occupa dals eveniments e svilups pli novs è questa perspectiva indispensabla per chapir ils svilups en Svizra. Tant pli servan ils texts sco spievel per reflectar las tematicas ch’han fatg ier da nus quai che nus essan oz e ch’ans vegnan er anc ad occupar damaun. Qua per illustraziun in pitschen excerpt or dal chapitel ‹Svilup a la societad da consum›:
«La midada da nossa societad d’ina dal ‹renunziar› ad ina dal ‹garegiar› en il decurs dal 19avel e 20avel tschientaner furma l’essenza da la societad da consum. Ina rolla decisiva han giugà ils Stadis Unids en il tranterguerras. L’‹American way of life› stat per in’industrialisaziun cumplessiva, ina vasta purschida e dumonda sin il martgà intern ed in’economia da credit offensiva. En rom da la reconstrucziun da l’Europa suenter la Segunda Guerra mundiala fa quest svilup er strada en Svizra ed ha midà dapi lura nossa vita da mintgadi a moda fundamentala.»
| Indicaziuns bibliograficas Autur(a): SRG SSR Titel: Timeline. La Svizra en transfurmaziun Onn da publicaziun: 2006 (portal) / 2018 (e-book) Dumber da segns: 132 800 Links Telechargiar sco e-book Preschentaziun |
MAGLIACUDESCHS 
