Bruno Blogg

«In blogger sun jau, betg in bist static. Bloggar n’ha da far nagut cun bloccar, il cuntrari. Las novas pussaivladads lubeschan a mintgin da far attent a l’atgna opiniun. Jau sun enconuschent sco Bruno Blogg e conversesch cun mes enconuschents e main enconuschents via facebook e twitter.»

SGUARD A L’INTERN

El è svanì quasi uschè spert sco quai ch’el è cumparì: Tranter l’avrigl 2012 ed il mars 2013 èn cumparidas en ‹La Quotidiana› en tut set columnas sut il pseudonim ‹Bruno Blogg›. Davart la dumonda tge autura u tge autur anonim che sa zuppa davos quest num na duai betg vegnir speculà qua. Percunter lain nus empruvar da far in pitschen psicogram da noss Bruno Blogg…

Bruno Blogg è bab d’in figl quasi creschì e ses status actual è sa midà avant curt – sco ch’el di sez gia per la segunda giada – «da maridà sin betg pli maridà». En sias columnas ans fa noss blogger palais ils pitschens e gronds quitads e fastidis, sin ils quals ins frunta en il mund modern e digital: Da conflicts cun il vischin e ses segapastget, da vacanzas all inclusive, da stress cun pleds-clav da cartas da credit, da recepts da cuschinar sin l’iphone e surtut da la tschertga da l’amur virtuala – il pli tard dapi ch’il figl ha ditg: «Bab, ti ed il chaun, quai n’ha betg perspectiva.»

«Uss sun jau tuttina ma decidì da publitgar mes profil. Betg forsa profils da construcziun. Mes profil persunal hai jau publitgà en ina bursa da contacts en la rait. (…) Jau na sun bain betg academicher, ma tuttina hai jau profilà mia prontadad da m’approfundar e discutar diversas tematicas da la convivenza umana e da ma fatschentar cun ils desideris e basegns d’ina eventuala nova partenaria. Speranza n’han mias anteriuras partenarias betg access a mes profil.»

Las columnas – u meglier ditg glossas – sa laschan leger cun in surrir sco impressiuns bain in pau caricadas, ma betg nunrealisticas da situaziuns en las qualas er ti ed jau ans chattain pli savens che quai ch’igl ans plascha. Ellas tractan da quel che crai d’avair tut sut controlla – e che dat a la fin tuttina en venter; dal giavisch da far diever da las novas purschidas digitalas a moda suverana – e dad esser a la fin il cugliunà; da vulair ir tras la vita a moda suverana – e da tuttina stuair realisar d’avair surstimà sasez e da vegnir suatà dals problems e problemins dal mintgadi. Cun auters pleds: Il psicogram da Bruno Blogg e il psicogram da l’um(an) postmodern e digital insumma. Ans lain consolar cun il patratg che quel che conceda quai, haja gia mez gudagnà la battaglia…

Indicaziuns bibliograficas
Autur(a): Bruno Blogg
Titel: Mes profil. Glossas tut auter che virtualas
Onn da publicaziun: 2012/13 (LQ) / 2015 (e-book)
Dumber da segns: 22 400

 
Links
Telechargiar sco e-book
Ulteriuras glossas