L’onn 2008 han gì lieu en la chapitala chinaisa Beijing ils gieus olimpics da stad. Quest diari da viadi rapporta en l’emprima part directamain dal grond eveniment da sport; en la segunda part vegnan intermediadas impressiuns dal viadi ch’è suandà tras la China.
Bernard Cathomas n’è nagin nunenconuschent en la ‹scena rumantscha›: suenter intgins onns d’instrucziun al Seminari scolastic dal Grischun è el stà secretari da la Lia Rumantscha (1980–1997), directur da RTR (2001–2009) ed ha er dirigì tranteren la fundaziun culturala svizra Pro Helvetia. A Beijing è el stà il 2008 «per incumbensa e cun pensums da Berna», vul dir ch’el ha represchentà la direcziun da SRG SSR. Ed ensemen cun sia dunna ha el decidì d’agiuntar a questa part uffiziala in viadi tras la China.
Cun questa chaschun è Cathomas vegnì supplitgà da RTR da nudar sias impressiuns; quellas èn vegnidas publitgadas sin rtr.ch en furma da blog (entaifer il dossier davart l’olimpiada a Beijing). En l’introducziun accentuescha Cathomas il caracter da diari da sias notizias: «In diari va bain per mai. El cuntegna elements subjectivs e persunals e n’è betg ina lavur schurnalistica per propi. (…) En mes diari pudais vus leger da mias observaziuns ed impressiuns, da mes patratgs e mes sentiments a l’olimpiada e durant in’emna viadi tras la China.»
La fermezza dal text giascha lura er en las numerusas observaziuns da la vita da mintgadi chinaisa ch’èn savens subtilas e surprendentas e formuladas lunsch davent da mintga connotaziun uffiziala. Qua in exempel:
«‹Quels dal nas lung› – uschia numnan ils Chinais nus alvs. En la metro han ins temp d’observar la glieud. In pievel ‹magher› da statura pitschna. Las fatschas da la glieud (giuvna) èn bain furmadas, senza chantuns, radundas, ils chavels spess, la dentadira perfetga. Jau crai ch’ils Chinais resentian nus dal vest cun noss nas lungs e nossas fatschas gizzas e chantunusas sco ‹trids›.»
Suenter l’olimpiada a Beijing ha il viadi d’in’emna manà l’emprim a Xi’an tar l’enconuschenta Armada da terracotga. Las proximas staziuns da viadi èn stadas Shanghai («che vala sco citad la pli bainstanta da l’Asia»), Wuzhen («il Guarda da la China») e Guilin («enconuschent per sia cuntrada singulara»). Là è suandà sco finiziun in viadi da 80 km sin il flum Lijaing fin a Yangshuo.
Ed il facit: «La China resta en memoria sco pajais cun in immens drive e probablamain in grond avegnir, sia glieud sco simpatica, ses clima (e surtut si’aria) sco in problem per nus da las muntognas – e per els sezs. Ma la finala fan ins viadis per vesair insatge nov. Quai porscha la China en abundanza.»
| Indicaziuns bibliograficas Autur(a): Bernard Cathomas Titel: Diari or da China Onn da publicaziun: 2008 / 2013 (versiun epub) Dumber da segns: 43 000 Links Telechargiar sco e-book Pagina oriunda dal blog |
MAGLIACUDESCHS 
