Pertge mangian mammas mandarinas adascus? Pertge dovra la figlia in team da camera per en scola? Pertge èsi normal da cumprar 25 pèra chalzers l’onn? Ludmilla Cahenzli – mamma da trais uffants e dunna cun job parzial – raquinta da las sturnadads dal mintgadi da famiglia.
Tranter il 2003 ed il 2011 èn cumparidas en ‹La Quotidiana› las columnas ‹Or da la vita da Ludmilla Cahenzli›. Medemamain il 2011 è suandada la versiun dals texts en furma dad e-book (ediziun da chattà.ch). Il 2012 ha l’autura (semi-)anonima edì sias columnas sco cudesch stampà, enritgì cun numerusas illustraziuns dad Yvonne Gienal. Ed il 2014 èn ils texts cumparids in’ulteriura giada sco fegliet en ‹La Quotidiana›, questa giada a basa da l’ediziun dal 2012.
En quests bundant diesch onns da preschientscha mediala ha Ludmilla Cahenzli gudagnà in bel dumber d’admiraturas ed admiraturs. Betg per nagut sa drizza «Milla» lura era en l’introducziun da la versiun stampada cun ils pleds «Hallo fans!» a ses public. Sche lain pia dar in sguard a las duas ediziuns cun l’egl dal collecziunader e fan…
La versiun digitala dal cudesch cumenza cun il bainvegni cun il qual Ludmilla Cahenzi ha introducì ils 17 da settember 2003 en la nova columna:
«Ludmilla Cahenzli è mes num. Dapi onns legel jau questa ed autras gasettas e ma grittent che nagin na scriva dals vairs problems. Perquai hai jau decidì da mezza prender a maun la tastatura e da dir tge che marscha en nossas chasadas, en nossas famiglias, en nossas lètgs. Tgi che crai che quai saja lungurus ed i na giaja tiers a nagin nagut tge che vegn traffitgà en la vita privata, lez va total d’accord cun mes um Eugen Cahenzli. Lez na s’interessescha er betg per problems da famiglia. Sche Vus pensais pia uschia sco mes um, lura faschai attenziun e na legì gea betg ils texts che cumparan da temp en temp sut la rubrica ‹Or da la vita da Ludmilla Cahenzli›.»
Silsuenter cumpiglia l’e-book tut las columnas en successiun cronologica, cun excepziun da l’ultima (ch’è cumparida suenter ch’il cudesch digital era gia preparà) ‹Mes auto tutga a mai e mes chastis era› e senza la mini-columna ‹Cuntenta cun pauc› che n’è betg cumparida en ‹La Quotidiana›.
La versiun stampada dal 2014 ha in’autra cuverta e cumparsa (illustraziuns dad Yvonne Gienal). Las columnas cumparan per part en in’autra successiun e sut differents titels. Ultra da quai èn vegnidas laschadas davent tut las columnas ch’èn stadas liadas a ses temp a persunas u ad in context actual (politica, societad e.a.). Igl èn quai ils suandants texts: ‹Mai pli litgar giu ina marca›, ‹Ludmilla è euforica e cinica pervi da la politica da famiglia›, ‹Ils Turitgais èn intgantads da l’urs – ch’è lunsch davent›, ‹In exempel pratic per plaschair!› ed ‹Eugen survegn la chautscha da far bogn da Leuenberger›.
Cun auters pleds: il vair fan da Ludmilla Cahenzli vegn a prender en maun tant l’e-book sco er il cudesch stampà per manchentar naginas da las expectoraziuns filosoficas da Milla!
Dal reminent: Tgi che smina che l’autura davos Ludmilla Cahenzli na saja nagin auter che Claudia Cadruvi – è sin la dretga via. Sco en ses ulteriurs cudeschs cuntegnan er las columnas da Ludmilla divers elements che renvieschan senza dubi a relaziuns realas ‹da la vita da Claudia Cadruvi›: la lavur sco schurnalista, la vita da famiglia cun duas figlias ed in figl… Ma malgrà tut ils tratgs autobiografics: la raquintadra na dastga mai vegnir messa a pèr cun l’autura – quai è ina da las emprimas chaussas ch’ins emprenda en l’instrucziun da litteratura. Ed uschia sviluppa la figura da Ludmilla Cahenzli sia tut atgna dinamica. Ella daventa cocheta ed isterica, stravaganta ed ipersensibla, ella exagerescha da gust (quai ch’ella na laschass sa chapescha mai valair!) e mintgatant è ella datiers dal collaps da la gnerva. Ditg curt: ella è gist uschia sco ses fans l’han gugent!
| Indicaziuns bibliograficas Autura: Claudia Cadruvi Titel: (Or) da la vita da Ludmilla Cahenzli Chasa editura: Surselva Romontscha (cudesch stampà) Onn da publicaziun: 2011 (e-book) / 2012 (versiun stampada) Dumber da segns: ca. 115 000 (tut las columnas; cudesch: 74 p.) Links Telechargiar sco e-book Cumprar Emprestar |
MAGLIACUDESCHS 
