‹Q› statti grond sin il frontispizi ed ‹I› sin la vart davos – ‹IQ› u ‹Il Quadern›. Quest’antologia litterara preschenta – sco ch’infurmescha il suttitel – ‹set texts rumantsch grischun-tudestgs da la Rumantschia giuvna›. La publicaziun è resortida d’ina concurrenza da scriver dal 2006.
Per uffants e giuvenils datti la ‹Plima d’aur› e per creschids il ‹Premi Term Bel›. E tge far cun giuvens creschids ch’èn memia vegls per l’emprima da questas duas concurrenzas da litteratura e forsa memia pauc experimentads per l’autra?
La stad 2006 han la Giuventetgna Rumantscha e la Quarta Lingua lantschà communablamain il project ‹Il Quadern›. Auturas ed auturs giuvens èn vegnids intimads d’inoltrar lur texts. Prescritta era sulettamain la lunghezza maximala da quels. En tut èn 20 giuvenils sa participads a questa concurrenza litterara. Ina giuria da linguists e litterats ha elegì set texts ch’èn cumparids il 2008 en furma stampada. Il layout captivant deriva da la firma da grafica turitgaisa elektrosmog.
‹Il Quadern› cuntegna – mintgamai en versiun sinoptica rumantsch grischun/tudestg – ils suandants texts: ‹Il nagin› (Fadrina Hofmann), ‹Prender cumià› (Anja Caminada), ‹Quatter giadas Budapest› (Chatrina Josty), ‹La degradaziun› (Tinetta Rauch), ‹Giselle› (Rico Valär), ‹Il champ› (Flurina Badel) e ‹La tschaina› (Arno Camenisch). Il 2006, cura che la concurrenza è vegnida lantschada, avevan las auturas ed ils auturs tranter 22 e 28 onns.
En il pled introductiv statti tranter auter:
«Ils texts selecziunads èn fitg differents. Els tractan d’in giast schenà en in local, dal cumià en ina chombra d’hotel, da regurdientschas d’ina amur a Budapest, d’ina sesida da monsters umans, d’ina oda ad ina sautunza, d’in siemi en letg e d’in dialog durant tschaina. Quai che collia las tschintg auturas ed ils dus auturs, sper la lingua rumantscha, èn lur lioms tranter las culturas linguisticas. È quai forsa in dals motivs ch’animescha els da scriver?»
Ch’i vala la paina da laschar far vuschs giuvnas lur experientschas en rom da talas occurrenzas mussa il fatg ch’il text da Chatrina Josty è vegnì premià il 2006 a Domat e che Arno Camenisch è daventà ils proxims onns in dals stars betg be da la scena da litteratura rumantscha, mabain svizra.
| Indicaziuns bibliograficas Autur(a): Div. autur(a)s Titel: Il Quadern Onn da publicaziun: 2008 (en furma stampada) / 2011 (e-book) Dumber da segns: 26 600 Links Telechargiar sco pdf Telechargiar sco e-book Recensiun |
MAGLIACUDESCHS 
