Tgi gida la famiglia da Miguel or da la miseria? Co che la giatta Zilla spendra a Gottfried la vita… Tge spiert sgulatscha tuttenina la notg en chombra? Dal mariner che ristga dad ir en il chaset dal tigher… E tge fa in pinguin en curtin? Istorgiettas da Gustav Tobler adattadas sco emprima lectura.
‹Kleine Geschichten für kleine Leute› – sut quest titel è cumparida ils onns 1970 en l’Advent-Verlag a Turitg ina retscha da cudeschs d’uffants che dueva avair in grond success. Ils texts simpels e captivants, las illustraziuns caracteristicas da Heinz von Gunten – tut quai ha procurà ch’ils divers toms da la retscha èn stads preschents sin la curuna da cudeschs da blers uffants anc lunsch viaden en ils onns 1980 e 1990.
Uschia na fai betg surstar che er Annina Christoffel e Francesca Riesch èn sa regurdadas, en tschertga da lectura adattada per il stgalim bass, da quests classichers or da l’atgna uffanza. En rom da lur lavur da matura l’onn 2007 a la Scola chantunala han ellas translatà ina schelta da texts or dals differents toms da la retscha. E cun consentiment da la chasa editura èsi er stà pussaivel da render accessibels ils texts sco cudesch digital.
I sa tracta en tut da diesch texts: ‹Agid il davos mument›, ‹Sche ti mo faschessas…!›, ‹Be in giat da la via›, ‹Quaggi›, ‹Bruno, il legher cumpogn›, ‹Ina legraivla visita da notg›, ‹Dus amis differents›, ‹In curius pop›, ‹Fido ed ils pulschains› e ‹Flip sa co sa gidar›. Ils raquints tractan da buns umans che gidan in l’auter en la miseria, d’animals da chasa che daventan fidaivels amis dals umans u er d’inscunter alleghers e surprendents cun creatiras da tutta sort.
Ils texts èn tegnids en in tun umanistic, però senza savurar a moda penetranta da moralina. Il stgazi da pleds vaira simpel e la lunghezza dals texts fan che quels èn adattads fitg bain sco emprima lectura suenter avair emprendì a conuscher tut ils bustabs – saja quai en scola u a chasa. Qua in pitschen insatg:
«Flip è in pinguin, in fitg amicabel. Sia part davant è tut alva e ses dies è nair. El è in grossatsch, ma tut glisch ed el traglischa en il sulegl. Sias alas sumeglian nudaglias. Cun chaminar ballantschan sias alas e ses pes si e giu, vi e nà , giu e si e nà e vi. El vesa ora sco in pitschen legher schuldà. Nagin na sa danunder che Flip è vegnì ni nua ch’el vuleva ir. En l’entir conturn na datti gnanc in pinguin. A Flip n’emporta quai dentant insumma nagut. Nus avain fitg gugent Flip, el è noss ami. Nus giugain bler cun el. El ha grond plaschair sche nus charsinain el. Durant tals muments sa Flip che noss’attenziun vala mo per el. Per mussar ses plaschair fa el ramurs sco in giat. (…)
Tuttina, uschè bella che la vita da Flip è tar nus, insatge nausch datti era qua. Flip odiescha chauns, perquai che quests chauns vilentan el e mainan el per il nas. (…) Flip vuleva ch’ils chauns chalian da tementar el. (…) El è sa vulvì ed ha fatg sgular il sablun da l’autra vart. Ils chauns n’han betg savì tge far. Els èn sesids sin lur chommas davos, han laschà pender lur lieunga ord bucca ed han guardà sin Flip tut surprais. Flip ha cuntinuà ses orcan da sablun, enfin ch’il davos chaun è stà svanì. Flip è anc adina tar nus. El è dentant vegnì anc pli gross, ma quai n’ans disturba insumma betg. Bler n’è betg sa midà dapi quel di a la riva. Nus bagnain el anc adina mintga di ed el marscha mintga di sin il chagliom. Sulettamain ils chauns laschan en ruaus noss Flip e quai è fitg bun uschia. Tgi sa sin tge ideas che Flip vegniss uschiglio anc?!»
| Indicaziuns bibliograficas Autur(a): Div. autur(a)s Titel: Pitschnas istorgias per glieud pitschna Onn da publicaziun: 2016 Dumber da segns: 43 500 Links Telechargiar sco e-book |
MAGLIACUDESCHS 
