Las columnas da Simon Denoth èn segnadas d’ina egliada interessada tant per ils pitschens svilups locals sco er per las grondas midadas globalas – e dal fin sensori da l’autur da colliar quests dus munds en ina moda nunusitada che fa adina puspè surstar.
Las stgars trenta contribuziuns èn cumparidas en ‹La Quotidiana› tranter il fanadur 2012 ed il november 2015 en la retscha ‹Convivenza›. Tematicamain èn ellas segnadas d’ina gronda variaziun che para a l’emprima egliada in pau arbitrara. Ma propi be a l’emprima egliada! Guardond in pau pli profund e legend ellas cun il medem spiert avert sco che l’autur las ha scrit, davent’ins bainspert conscient, tge che la curt episcopala ha da far cun ils Coreans ed ils helicopters da São Paulo cun il giraun alpin.
Las columnas tractan d’ina vart dumondas da la Rumantschia e da la plurilinguitad svizra sco er aspects politics chantunals e naziunals (svilup turistic, energia atomara, taglia da baselgia, servetsch militar e.a.). Da l’autra vart tanscha l’egliada en terras vischinas (Italia, Germania, Portugal) e lontanas (Israel, Africa dal Sid, Brasilia), mintgamai cun in sguard interessà ma er critic sin aspects politics e socials. Ed ina terza gruppa da columnas tracta svilups actuals en il traffic e commerzi (dronas, traffic public, Uber, commerzi mundial sin vias d’aua, airbnb), en il mund digital (Twitter, google, e-commerce), ma er en la societad en general (Quant vala la vita d’in uman?, omosexualitad).
Sco vair striun sa mussa Denoth però en quel mument ch’el cumbinescha quests munds ch’èn apparentamain fitg divers ed esters in a l’auter. Cura ch’el confrunta la Lia Rumantscha cun las pli novas teorias da communicaziun, cura ch’el discurra en connex cun la politica da persunal da la Confederaziun da glass ceiling, cura ch’el propona da transfurmar la taglia da baselgia en ina taglia sociala u d’introducir in fond da stadi tenor l’exempel da la Norvegia u dal Singapur…
In bel exempel per questa confruntaziun dal dalunsch e damanaivel, dal tradiziunal ed ultramodern furma la descripziun da sia visita en la metropola brasiliana «São Paulo – in moloch da betun surdimensiunà»:
«Ses intschess è circa uschè grond sco il chantun Grischun cun ina pitschna differenza: sin ils passa 7000 kilometers quadrats na vivan betg 200 000, mabain stgars 20 milliuns persunas. Cun quai tutga São Paulo tar las citads las pli populadas dal mund. (…)
La metro è bain pli moderna e netta che quella da Paris u Milaun, ma tut quels ch’han da dir insatge en la citad prefereschan l’auto. Per l’auta societad datti però in’alternativa: l’aria. Actualmain ha São Paulo il pli grond traffic da helicopters en l’entir mund.
Suenter tantas superlativas èsi era bel da turnar enavos en Svizra. Co schain nus qua tar nus: ‹Small is beautiful.›»
En ses ultim text fa Denoth ina sort bilantscha dal cuntegn da sias columnas: «Forsa avais Vus percurschì mia preferenza per cifras? Tranter auter avais Vus legì las suandantas chaussas: 22 chantuns svizzers han mo ina lingua uffiziala, (…) ils centers da calculaziun da Google dovran in volumen d’electricitad che correspunda a quatter pertschient dal consum d’electricitad en Svizra, (…) en 22 pajais vegn discurrì arab (…) e tar passa 1500 spezias d’animals han ins observà in cumportament omosexual. Fatgs ch’il mund na dovra betg? Forsa. Ma sch’els provegnan da funtaunas fidablas e sch’ins metta els en il dretg context survegnan els tuttenina ina fatscha.»
| Indicaziuns bibliograficas Autur: Simon Denoth Titel: Al puls da la glocalisaziun Onn da publicaziun: 2012–2015 (La Quotidiana) / 2016 (e-book) Dumber da segns: 87 000 Links Telechargiar sco e-book |
MAGLIACUDESCHS 
