Tenor il titular dal Premi Nobel Daniel Kahneman n’emprendan investiders tendenzialmain betg da lur sbagls. Ils inputs cuntegnids en questa publicaziun duain gidar a midar quai – tips e trics per il martgà da bursa, l’emprim pass per daventar in pitschen retg da la Wallstreet…
Co dar en egl en la massa d’inserats e reclamas che cumparan en las medias? Per exempel cun porscher a las lecturas ed als lecturs in cuntegn infurmativ che sa preschenta be a moda indirecta sco mesira d’acquistar nova clientella. Quai è stà la devisa d’ina seria d’inserats da la banca Raiffeisen ch’èn cumparids (e per part sa repetids) en ‹La Quotidiana› ils onns 2009/2010.
Sut il titel ‹Sbagls d’investiders› preschentan ils radund 20 texts cussegls per il martgà da bursa. I sa tracta qua enconuschentamain d’in mund che funcziunescha tenor sias atgnas reglas. Magari hai num d’investir a moda anticiclica e da far gist il cuntrari da quai che manass a l’emprima egliada svelt ad in aut gudogn. Qua dus exempels or dal cuntegn ch’approfundeschan precis questas duas tematicas:
Sut il titel ‹Il preschent engianus› vegn ins a savair ch’investiders han la tendenza da s’orientar tenor il preschent u perfin tenor il passà. Ma quai è precis in dals ‹sbagls d’investiders› als quals il titel sa referescha. Pertge che la bursa s’orientescha tenor l’avegnir:
«Betg quai ch’è scrit oz en gasetta decida il curs da la bursa, mabain la lingia grassa da damaun resp. quella che vegn stampada en sis fin nov mais.»
Ils experts din schizunt che quai saja precis l’avantatg dals martgads envers l’economia. Uschia èsi numnadamain pussaivel ch’ils curs s’augmentan er sche las novitads èn nauschas. Savens è pia gist il temp cura che la tema dominescha il parchet da la bursa il pli adattà per investir.
In segund exempel: «A la bursa pon ins gudagnar 1000 %, dentant perder mo 100 %.» Quai è bain correct, ma en questa sabientscha sa zuppa er il privel da sa laschar engianar d’autas renditas. Las perspectivas da pudair far quint cun in fitg aut gudogn carmalan ed animeschan la fantasia – ins siemia d’autos, da villas u da vacanzas…
«Uschia capiti ch’ils investiders emblidan la ristga. La finala porschan emprests dal stadi da diesch onns pauc per noss mund emoziunal, schegea che nus gudagnassan uschia – sche nus restain objectivs – forsa dapli daners.»
| Indicaziuns bibliograficas Autur(a): Div. autur(a)s Titel: Sbagls d’investiders. Tips e trics per il martgà da bursa Onn da publicaziun: 2009/2010 (La Quotidiana) / 2012 (e-book) Dumber da segns: ca. 14 500 Links Telechargiar sco e-book Dossier tematic davart las basas da l’economia |
MAGLIACUDESCHS 
