Il cudesch da Vichipedia ‹Europa dal Nord› or da la retscha ‹Purtrets dals stadis europeics› preschenta l’Islanda, il Danemarc, la Norvegia, la Svezia e la Finlanda. Ultra da quai cumpiglia el ils artitgels introductivs ‹Scandinavia› e ‹Vikings› ed in’agiunta cun chartas topograficas.
Sur la pagina Wikipedia:cudeschs arrivan ins directamain a cudeschs da Vichipedia preparads per vegnir stampads on-demand. La purschida actuala è sutdividida en trais gruppas: ediziuns (che cumpiglian la transposiziun d’in text litterar, d’in tractat istoric e.a., mintgamai cun materialias accumpagnantas), cudeschs tematics (istorgia, cultura, natira, societad etc.) e retschas da cudeschs. En rom da quest’ultima gruppa vegnan per l’ina preschentadas las singulas epocas da l’istorgia mundiala, per l’autra purtretads ils differents stadis europeics.
L’emprim tom da la retscha ‹Purtrets dals stadis europeics› tracta l’Europa dal Nord:
«L’Europa dal Nord è enconuschenta sco destinaziun turistica segnada d’ina natira intacta e da cuntradas infinitas. Ed ils pajais da l’Europa dal Nord tutgan tar ils pli sviluppads insumma e valan sco exemplarics sin il sectur da l’assistenza sociala. Quests aspects e blers auters vegnan preschentads en quest cudesch en furma d’artitgels da survista sco er en purtrets dals singuls stadis.»
Il cudesch cumenza cun l’artitgel da Vichipedia davart la Scandinavia. Quel introducescha en la tematica e porscha ina survista da las differentas significaziuns ch’ils terms ‹Scandinavia› ed ‹Europa dal Nord› han gì en il decurs dal temp. Alura vegn approfundà in ulteriur element da la schientscha nordica e da la vista d’ordaifer sin quella, numnadamain ils Vikings. La lectura da quest artitgel mussa ina giada dapli, co ch’in fenomen istoric è vegnì transfurmà e reinventà en il decurs dal temp. Cun auters pleds: Tge che vegn chapì oz sut ‹Vikings› di dapli davart la schientscha naziunalistica dapi il 19avel tschientaner che davart il pievel istoric sco tal. Ma quai na renda il fenomen betg main interessant; il cuntrari: el vegn cumpletta uschia tras in’ulteriura fassetta ch’al enritgescha supplementarmain.
Suenter quest’introducziun, che cumpiglia radund in quart da las 200 paginas dal cudesch, suondan ils purtrets sco tals dals singuls stadis da l’Europa dal Nord. Quels cuntegnan mintgamai datas statisticas, tractan la geografia dal pajais, porschan infurmaziuns davart la populaziun (demografia, linguas, religiun) e preschentan l’istorgia dal pajais, il sistem politic, l’economia, la cultura ed auter pli. Ed a la fin dal cudesch sa chattan chartas geograficas che porschan ina survista da l’Europa dal Nord en general e da mintgin dals singuls stadis. Sco tut ils cudeschs da Vichipedia cuntegna er quest tom numerusas fotografias, maletgs e chartas. Co ch’il cudesch sa preschenta en la varianta ‹bibliofila› – vul dir cun cuverta dira e fotografias en colur – vegn ins per exempel a savair cun l’emprestar en la Biblioteca chantunala (catalog online). Il pli simpel chattan ins là tut ils cudeschs da Vichipedia cun endatar en la funcziun da tschertga la noziun ‹PediaPress› (= la chasa editura dals cudeschs da Vichipedia).
| Indicaziuns bibliograficas Auturs: Vichipedia rumantscha Titel: Europa dal Nord. Purtrets dals stadis europeics 1 Chasa editura: Vichipedia rumantscha Onn da publicaziun: 2016 Dumber da segns: 338 000 (222 p.) Links Telechargiar il cudesch sco e-book Empustar sco cudesch stampà (book-on-demand) Emprestar Dossier tematic |
MAGLIACUDESCHS 
