Versets

Questa publicaziun cumpiglia ina rimnada da radund 40 versets per uffants. Ils singuls chapitels dal cudesch: il temp, primavaira e stad, sulegl e plievgia, animalets, bain puril, mastergns, famiglia, las parts dal corp, versets da la detta, versets da dumbrar, gieus da moviment, advent e Nadal.

SGUARD A L’INTERN

Tar versets per uffants sa tracti da vers che vegnan mussads ad uffants pitschens, saja quai da vart dals geniturs, en scoletta u er tranter ils uffants sezs.

Damai ch’ils versets sa drizzan en emprima lingia ad uffants en la vegliadetgna prescolara, stat l’oralitad en il center. Ils vers vegnan savens discurrids a moda ritmica u er melodica; perquai na sa laschan il verset per uffants e la chanzun d’uffants strusch differenziar in da l’auter. Als uffants vegnan però savens er recitads versets ch’èn l’emprim cumparids en furma da cudeschs (p.ex. or da classichers da la litteratura d’uffants sco ‹Struwwelpeter› u ‹Max und Moritz›).

Tals versets duain gidar ils uffants en lur svilup da l’expressiun linguistica, servan a stabilir il stgazi da pleds, gidan ad emprender da dumbrar u promovan – en cumbinaziun cun moviments – las abilitads motoricas. Ina furma speziala dal verset per uffants furman ils versets da trair la sort.

Magari duain ils vers instruir ils uffants, als educar u gidar a guidar els en dumondas moralas. E lura datti er ils versets divertents, che giogan cun la rima, che mettan en dumonda la logica, che daventan absurds, drastics u vulgars. In interessant fenomen èn ultra da quai ils versets magics che cumparan gist er en la cultura rumantscha («Eni, eni, dep, utclamana schnep…»).

Ils versets rimnads en questa pitschna publicaziun èn da differenta derivanza (transposiziuns dals idioms, translaziuns dal tudestg, novas creaziuns). Els tractan ina vasta paletta da tematicas e mussan ch’il verset po er sa sviluppar e s’adattar bain a novas situaziuns – per exempel a la bilinguitad:

«In, dus, trais – kalt isch nit heiss.
Quatter, tschintg, sis – i ässa gära ris.
Set, otg, nov – i bin doch kei gof.
Diesch, indesch, dudesch – i läsa grad an cudesch.»

Indicaziuns bibliograficas
Titel: Versets
Onn da publicaziun: 2014 (e-book)
Dumber da segns: 7500
 
Links
Telechargiar sco e-book