I dat chaussas che sa midan d’in cuntin ed autras che mantegnan lur muntada a lunga vista – quai vala er per il sistem da pensiun. Da las tematicas stablas en connex cun il pensiunament s’occupa la broschura ‹Ir en pensiun. Tips per sa preparar sin questa nova part da la vita›.
A partir da tge vegliadetgna èsi pussaivel da sa laschar pensiunar? E cura pon ins retrair tge rentas? Tgi che sa confrunta cun talas dumondas è dependent da funtaunas d’infurmaziun fitg actualas che resguardan ils svilups ils pli novs en la politica sociala. Forsa ch’il portal ch.ch fiss qua in bun agid? Tar quel sa tracti d’in servetsch da la Confederaziun, dals chantuns e da las vischnancas ch’emprova da dar a moda nuncumplitgada resposta a las dumondas che sa tschentan en il contact da las burgaisas e dals burgais cun il stadi. E propi cumpiglia quel in chapitel ‹Co funcziuna il sistem da pensiun?› (cf. link sutvart) che na respunda betg be las dumondas surmenziunadas, mabain tracta er numerusas autras formalitads ch’èn da resguardar – e quai bain chapì en tut las quatter linguas naziunalas.
Da l’autra vart è la pensiun colliada cun midadas en l’ambient social e cun sfidas persunalas che na sa midan betg dad oz sin damaun. Da talas ‹valurs perpetnas› – che valevan gia per las generaziuns precedentas e che vegnan er a mantegnair en l’avegnir lur muntada – s’occupa la broschura da la Pro Senectute ‹Ir en pensiun. Tips per sa preparar sin questa nova part da la vita›. Quella è bain cumparida gia il 1984. Ma in sguard sin las tematicas che vegnan tractadas mussa svelt ch’ella è oz pli actuala che mai: ‹Planisar ensemen›, ‹Calcular ordavant›, ‹S’occupar ad uras da dumondas giuridicas›, ‹Avair quittà da sia sanadad›, ‹Chasa ed economia›, ‹Cultivar contacts cun autra glieud› ‹Esser avert per il nov›, ‹Scuvrir danovamain ses interess›, ‹Tschertgar novas incumbensas›, ‹Metter auters accents› – quai sa legia sco ina veritabla instrucziun da diever da la vegliadetgna da pensiun.
E pelvaira porschan ils singuls texts in ritg stgazi d’ideas ed impuls che fan gust sin il pensiunament, preschentond quel sco fasa da la vita ch’avra novs orizonts:
«L’activitad da gudogn è orientada vers la prestaziun visibla, vers producziun e resultats. La nova perioda da la vita avra autras pussaivladads: ella permetta reflexiuns davart l’atgna situaziun persunala. Il plaschair ed il gust da far insatge pon remplazzar la ‹producziun cun resultats concrets›. Avair dapli temp per patratgs ed experientschas, per sentiments, per auters umans e per dumondas da la vita maina a novas ideas ed ad ina pli gronda chapientscha per l’essenzial. Uschia po crescher er la libertad interna che tutga tar la sabientscha da la vegliadetgna.»
| Indicaziuns bibliograficas Autur(a): Pro Senectute Titel: Ir en pensiun. 10 tips per sa preparar sin questa nova part da la vita Onn da publicaziun: 1984 Dumber da segns: 6000 Links Preschentaziun Co funcziuna il sistem da pensiun? |
MAGLIACUDESCHS 