«Insaco ma tegn jau vi dal filosof chinais Konfuzius ch’ha ditg ‹La via è la finamira›. I n’è betg a priori impurtant da cuntanscher ina finamira. Las bleras pussaivladads sa dattan pir sin la via ch’ins prenda sut ils pes. Senza vulair ves’ins andetgamain perspectivas dal tuttafatg novas…»
Tar las columnas da Diana Jörg sa tracti gia da la terza seria da columnas sin ‹Magliacudeschs› ch’èn cumparidas oriundamain en ‹La Quotidiana› e la ‹Südostschweiz› en la retscha ‹Convivenza›. (Davart la retscha cf. las infurmaziuns introductivas tar las columnas da Catrina Waldegg.) Sper Simon Denoth, Diana Jörg e Catrina Waldegg han fin oz contribuì las suandantas persunas a las bundant 350 contribuziuns en rumantsch grischun: Pieder Caminada, Fadrina Hofmann, Hans-Peter Schreich, Claudia Cadruvi, Gion Tscharner, Anna Negrini, Viola Pfeiffer e Bettina Cadotsch.
Diana Jörg (*1965) è creschida si a Domat, ha vivì e lavurà a Turitg ed è puspè returnada en il Grischun. En sia vita professiunala è ella tranter auter engaschada sco redactura tar SRF ed RTR. Sias columnas èn cumparidas tranter il favrer 2010 ed il matg 2012. Ellas tractan diversas tematicas da la vita da mintgadi da l’autura e da ses ambient famigliar e professiunal ed èn tegnidas en in tun persunal, sco che l’autura tematisescha sezza en sia columna ‹da cumià›:
«Savens n’èsi betg stà simpel da scriver da mias experientschas persunalas. Mintgatant hai jau dumandà mes um, sche mes texts sajan memia intims, sch’els hajan ina colliaziun memia stretga cun mia vita… Ma tge èn columnas sche betg raquints da la vita, texts persunals? Ins s’occupa d’in tema – ina giada pli fitg, ina giada pli pauc. Insatge persunal tradesch’ins adina, tuttina sche quai capita tranter las lingias u a moda explicita.»
Las columnas da Diana Jörg fan dal reminent er part dal dossier tematic ‹Columnas da dunnas› da ‹chattà› cumparì il 2015. Questas columnas tematisescha tuttas la convivenza d’in punct da vista feminin: Las quatter columnistas Claudia Cadruvi, Diana Jörg, Aita Dermont e Gisula Tscharner represchentan ina vasta paletta d’experientschas professiunalas. Ellas èn stadas u èn activas sco schurnalista, moderatura, magistra, spirituala, translatura, autura ed auter pli. Ma lur texts enserran er tematicas da tut auter gener: sguards subtils sin la vita da mintgadi, impressiuns persunalas sco mamma, partenaria e dunna da chasa e commentaris davart la convivenza en general.
| Indicaziuns bibliograficas Autur(a): Diana Jörg Titel: La via è la finamira Onn da publicaziun: 2010–2012 (La Quotidiana) / 2013 (e-book) Dumber da segns: 60 000 Links Telechargiar sco e-book Dossier ‹columnas dunnas› |
MAGLIACUDESCHS 
