Quest cudesch preschenta las premissas spiertalas (illuminissem) ed ils eveniments centrals da l’epoca che tanschan dals success da la Revoluziun americana (1774/76) e franzosa (1789) sur las Guerras da coaliziun (1792–1815) fin al naufragi da la Revoluziun tudestga (1848/49).
«Cudeschs per pitschens e cudeschs per gronds, cudeschs stampads e cudeschs digitals, cudeschs per las vacanzas e cudeschs per il studi, cudeschs satigls e da quels propi gross…» Uschia hai num en il text introductiv tar il blog magliacudeschs.ch. En la categoria dals ‹cudeschs propi gross› tutga bain er il tom ‹Illuminissem e revoluziuns› or da la retscha da cudeschs da Vichipedia ‹Epocas da l’istorgia mundiala›. Cun sias radund 300 paginas e ses bundant 520 000 segns (senza bibliografias/annotaziuns) porscha el pavel per ils magliacudeschs per propi.
Dal reminent: Filtrar ils cudeschs preschentads en il blog magliacudeschs.ch tenor lur lunghezza pon ins cun cliccar en la colonna a dretga en las categorias. E qua ves’ins lura er gist ch’i dovra cudeschs dal caliber dal ‹Nov Testament› per surpassar las dimensiuns dal tom ‹Illuminissem e revoluziuns›…
Ma enavos tar il cuntegn da lezza publicaziun: Ils artitgels cuntegnids en quel sa laschan divider en trais parts: L’emprima part, ‹Epoca da las revoluziuns›, porscha in’introducziun en la tematica e preschenta il temp tranter il 1750 ed il 1850 en survista. La segunda part, ‹Illuminissem›, illustrescha las premissas spiertalas da l’uschenumnà ‹temp da sava›, las qualas tanschan per part enavos en il 16avel e 17avel tschientaner. E la terza gruppa d’artitgels maina alura la lectura ed il lectur pass per pass tras ils eveniments principals da las vieutas politicas che duevan segnar l’epoca (‹Revoluziun americana›, ‹Revoluziun franzosa›, ‹Guerras da coaliziun›, ‹Restauraziun›, ‹Revoluziun tudestga dal 1848/49›). A la fin dal cudesch renda ina ‹Tavla cronologica› anc ina giada attent a moda tabellarica als eveniments centrals da l’epoca.
Il temp da l’illuminissem e da las revoluziuns dueva gidar a far strada a blers aspects da la moderna, saja quai en la politica, en l’economia, en la societad u en la cultura. Ma ord nossa perspectiva, vul dir en quel mument che bler ‹modern› para da sa chapir da sasez, sa tschenta inevitablamain la dumonda suenter l’origin e las caracteristicas da la ‹moderna›. A questa dumonda (ed ad auters noziuns-clav sco ‹temp da sava› u ‹lung 19avel tschientaner›) sa deditgescha l’artitgel introductiv. E da la resposta che vegn dada resorta gia quai che vala er per ils ulteriurs aspects che vegnan tractads, numnadamain ch’in cudesch ‹gross› è magari necessari per pudair tractar tschertas tematicas a fund ed a moda differenziada:
«Tut tenor sch’ins accentuescha la moderna sco epoca istorica ubain sco concept spiertal, vegn er ses cumenzament definì a moda fitg differenta: sut l’aspect da l’istorgia spiertala cumpiglia la moderna er la premoderna ch’iniziescha en il 15avel tschientaner cun la renaschientscha; ord vista economica cumenza ella vers la mesadad dal 18avel tschientaner cun l’industrialisaziun; la moderna politica è colliada cun la Revoluziun americana e la Revoluziun franzosa sco er cun il naziunalissem dal 19avel tschientaner; ed en l’art, sco denominaziun d’in singul stil, è il term surtut collià cun ils decennis da la fin dal 19avel e l’entschatta dal 20avel tschientaner.»
| Indicaziuns bibliograficas Autur(a): Vichipedia rumantscha Titel: Illuminissem e revoluziuns Onn da publicaziun: 2017 Dumber da segns: 520 800 Links Telechargiar il cudesch sco e-book Empustar sco cudesch stampà (book-on-demand) Emprestar Dossier tematic |
MAGLIACUDESCHS 
