Ils fatgs da furmaziun cumpiglian ils suandants stgalims: stgalim primar (incl. scolina), stgalim secundar I, stgalim secundar II (furmaziun fundamentala professiunala e scolas medias), stgalim terziar (furmaziun professiunala superiura e scolas autas) e la furmaziun supplementara.
Pisa, Harmos, Plan d’instrucziun 21… Ch’il sectur da scola sa chatta en in moviment cuntinuant è quasi gia ina constataziun banala. Ed il fatg ch’ils chantuns defendan lur particularitads e lur autonomia na gida er betg gist ad avair la survista. Per fortuna datti qua la pagina sistemdafurmaziun.educa.ch. Quella vegn purtada da la Confederaziun e da la CDEP (Conferenza svizra da las directuras e dals directurs chantunals da l’educaziun publica) e porscha – en las quatter linguas naziunalas ed en englais – ina survista cumplessiva dal sistem da furmaziun svizzer. Tranter auter vegn explitgada la repartiziun da las cumpetenzas sin ils differents stgalims statals:
«Ils chantuns èn responsabels per ils fatgs da furmaziun, uschenavant che la Constituziun federala na declera betg la Confederaziun sco cumpetenta. Las cumpetenzas da la Confederaziun pertutgan il sectur da furmaziun postobligatoric: tar las scolas da maturitad gimnasiala, tar la furmaziun professiunala e tar scolas autas èn la Confederaziun ed ils chantuns partenaris en quai che reguarda la responsabladad per ils fatgs da la furmaziun publica. Cunzunt en la scola obligatorica surpiglian las vischnancas differentas incumbensas.»
La pagina sa divida en ils champs ‹Ils fatgs da furmaziun›, ‹Scola obligatorica›, ‹Scolas autas da pedagogia›, ‹Stgalim secundar II›, ‹Stgalim terziar›, ‹Pedagogia speziala›, ‹Furmaziun supplementara› e ‹Noziuns da clav›. S’orientond a questa structura ha ‹chattà› preschentà il sistem da furmaziun en ‹La Quotidiana› (en rom da la ‹Preschentaziun da l’emna›). Questas totalmain nov preschentaziuns èn vegnidas unidas, ensemen cun la survista grafica dad educa, ad in cudesch en format pdf che porscha ina sort cumpendi dals fatgs da scola en Svizra.
En las preschentaziuns da chattà è vegnì dà bada d’integrar plitost infurmaziuns generalas che mantegnan lur actualitad er a mesa e lunga vista. Medemamain èn las infurmaziuns vegnidas regiunalisadas in pau, uschia ch’ins vegn per exempel a savair tge scolas professiunalas u scolas medias ch’existan en il chantun Grischun. Ed en cumplettaziun da questas infurmaziuns da basa cuntegnidas en il cudesch digital, pon ins visitar la pagina numnada per s’infurmar davart ils svilups e midaments actuals. Che la lezia da tegnair à jour lez portal vegn prendida seriusa mussa la data da l’ultima actualisaziun ch’è inditgada a la fin da mintga pagina.
| Indicaziuns bibliograficas Autur(a): Div. autur(a)s Titel: Sistem da furmaziun svizzer Onn da publicaziun: 2017 (e-book en format pdf) Dumber da segns: 112 400 Links Telechargiar sco e-book Dossier tematic Preschentaziun dal sistem da furmaziun svizzer sin educa.ch |
MAGLIACUDESCHS 
