En sia strategia pertutgant la midada dal clima concentrescha il chantun Grischun l’agir sin 10 secturs. Quels cumpiglian d’ina vart mesiras da protecziun dal clima resp. che servan a reducir l’emissiun da gas cun effect da serra e da l’autra vart adattaziuns sco respostas a la midada dal clima.
Sur decennis han surtut organisaziuns nunguvernamentalas e cumbattants singuls purtà il moviment per la protecziun da l’ambient e dal clima. Bain aveva ina gruppa d’experts dal Club of Rome gia avertì il 1972 en il famus cudesch ‹The Limits to Growth› – ch’era dal reminent vegnì preschentà a ses temp a Son Gagl – cun la suandanta constataziun: «Sche la populaziun mundiala, l’industrialisaziun, la polluziun da l’ambient, la producziun da mangiativas e l’explotaziun da materias primas cuntinuescha sco da preschent, vegnan ils cunfins da la creschientscha sin terra ad esser cuntanschids en il decurs dals proxims tschient onns.»
Ma facticamain cumpara la protecziun da l’ambient e dal clima pir dapi la Conferenza da Rio dal 1992 sin la glista da tractandas da la communitad internaziunala da stadis. En rom da questa conferenza è vegnida deliberada la Convenziun da basa da las Naziuns unidas davart las midadas dal clima. Dapi la Conferenza da Rio ha lieu mintg’onn in inscunter suprem che tracta dumondas da la midada dal clima. D’impurtanza en quest connex è surtut il Protocol da Kyoto da l’onn 1997 che definescha per ils stadis industrials valurs maximalas liantas areguard l’emissiun da gas cun effect da serra.
La Svizra sa chatta tranter ils stadis ch’han ratifitgà la Convenziun da Rio ed il Protocol da Kyoto. La finamira centrala che la Confederaziun ha definì en sia legislaziun davart il CO2 sa cloma sco suonda: Minus 20 pertschient CO2 fin l’onn 2020 (cumpareglià cun l’onn 1990). Per realisar questa e las ulteriuras finamiras da protecziun dal clima èn sa chapescha er dumandads ils chantuns. En sia strategia dal clima dal 2015 ha la Regenza grischuna enumerà 10 puncts concrets per agir, ils quals sa laschan subsummar sut las duas noziuns ‹protecziun dal clima› ed ‹adattaziun al clima›. E sco finamira a lunga vista è formulada en il document la suandanta visiun:
«Il chantun Grischun prenda primarmain per mauns il consum d’energia – ed indirectamain natiralmain er l’igiena da l’aria. I vegn prendì en mira ina societad da 2000 watts – quai vul dir: mintga burgaisa e mintga burgais dal Chantun reducescha fin l’onn 2050 si’emissiun da gas cun effect da serra a maximalmain 1,5 tonnas per onn.»
| Indicaziuns bibliograficas Autur(a): Uffizi per la natira e l’ambient Titel: Clima en il grischun – quo vadis? Strategia da clima dal chantun Grischun Onn da publicaziun: 2015 Dumber da segns: 25 600 Links Telechargiar en format pdf Preschentaziun en ‹La Quotidiana› |
MAGLIACUDESCHS 
