La Chanzlia federala – Attenziun, il film cumenza!

Dretgs politics, communicaziun, lavur da stab – las incumbensas da la Chanzlia federala èn multifaras, ma sa splegan savens in pau en la sumbriva da las politicras e dals politichers. En questa broschura sa drizza la glisch da reflectur per ina giada sin las persunas davosvart.

SGUARD A L’INTERN

La Confederaziun publitgescha mintg’onn in bel dumber da broschuras rumantschas. Las pli enconuschentas èn bain ‹La Svizra en furma concisa›, la ‹Survista statistica da la Svizra› sco er ils carnets da votar. Ma sper quests classichers datti er publicaziuns tematicas da tut gener u carnets che preschentan singulas partiziuns da l’administraziun federala e lur incumbensas. A quest’ultima categoria sa lascha er attribuir la broschura ‹Attenziun, il film cumenza!› che la Chanzlia federala ha edì il 2012.

Igl è bain nagina casualitad che quest purtret da la Chanzlia federala è cumparì dal temp che la Grischuna e Rumantscha Corina Casanova era chanceliera federala. E qua sa laschass gist er exprimer ina critica envers l’activitad da publicaziun da la Confederaziun: La dumonda, schebain la lingua rumantscha vegn resguardada tar questa u l’autra broschura dependa memia savens da singulas persunas en uffizi, las qualas èn gist sensibilisadas per la quarta lingua naziunala… Cun applitgar criteris in pau pli stringents sa laschass bain inqual ulteriura broschura transponer cun buna conscienza en rumantsch.

Ma da la critica puspè enavos tar il best practice: Tar la broschura ‹Attenziun, il film cumenza!› sa tracti – sco ch’il titel di gia – da l’emprova da preschentar ad in public interessà la lavur da la Chanzlia federala en moda in pau nunusitada, ludica. Ella illustrescha cun texts e maletgs trais tipics dis da lavur dal post da stab dal Cussegl federal: il mardi, la mesemna e la gievgia. Sfegliond la broschura pon ins suandar quasi ura per ura da tge lavurs ch’ils emploiads da la Chanzlia s’occupan durant quests trais dis.

En il center da la lavur emnila stat mintgamai la sesida dal Cussegl federal da la mesemna. Areguard quella vegnan ins er a savair in u l’auter detagl pli persunal:

«09:00 Suenter ina curta baterlada vegni midà dal ‹ti› amical al ‹Vus› uffizial. La seduta ha cumenzà. Durant la seduta pledentan las cusseglieras federalas ed ils cussegliers federals lur collegas cun lur titels – per exempel ‹dunna cussegliera federala› u ‹signur cusseglier federal› – per suttastritgar che lur opiniuns cuntrarias na sa drizzan betg cunter la persuna, ma èn motivadas da lur differentas funcziuns.»

Il mardi stat pia sut l’ensaina da las ultimas preparativas per questa sesida, la mesemna vegnan prendidas e communitgadas las decisiuns – e la gievgia? «Cur ch’ina seduta finescha, cumenza la proxima…»

Indicaziuns bibliograficas
Titel: La Chanzlia federala – Attenziun, il film cumenza! Ina reportascha davart il post da stab dal Cussegl federal
Onn da publicaziun: 2012
Dumber da segns: 34 200
 
Links
Telechargiar sco pdf
Emprestar