Il cudesch en format pdf preschenta tut las spezias da reptils ch’èn derasadas en Svizra. Ultra da quai porscha el in’introducziun generala en las caracteristicas e l’evoluziun dals reptils. Ed a la fin vegn mussà ch’era ils dinosaurs – ils reptils dal mesozoicum – eran da chasa en Svizra.
Il salip e la furmicla
Tar la versiun en rumantsch grischun dal ‹salip e la furmicla› sa tracti d’ina transposiziun integrala dal raquint da Sep Mudest Nay (cumparì l’onn 1940 en versiun sursilvana). Ed a la fin cuntegna l’e-book il text da la chanzun populara ch’è cumprovada da l’Engiadina fin en Surselva.
Emprima Guerra mundiala
L’Emprima Guerra mundiala è vegnida manada tranter il 1914 ed il 1918 en l’Europa, il Proxim Orient, l’Africa e l’Asia da l’Ost ed ha chaschunà radund 17 milliuns victimas. Las acziuns da guerra han cumenzà l’avust 1914. A quellas era precedida l’Attentat da Sarajevo dals 28 da zercladur.
Fortunat Kauer
En ses roman ‹Fortunat Kauer› (1998) sa mova Linard Bardill en munds cuntrastants: en quel da las muntognas e quel da la Bassa, en quel da la Svizra paschaivla e quel da l’anteriura Jugoslavia en guerra, en quel da l’accumpliment da sasez e quel da la responsabladad envers ils conumans.
Corp e sanadad
Co sa protegian ins correctamain cunter arsentadas dal sulegl? Tge precis èn bacterias? Tge capita tar ina radiografia? Cura èn tge pollens en l’aria? Èsi d’avantatg d’esser schumellin? Tge bulieus pon ins mangiar senza privel? E tge è propi malaria? Il Simsalabim dat resposta.
Ziràn – il palantschieu sura da la baselgia da S. Martin
Sco che mussan retschertgas dendrocronologicas è il palantschieu sura vegnì realisà curt suenter il 1114. Quest cudesch illustrà en format grond preschenta ils misteris da las tavlas picturadas en in rom ch’è commensurà a quest’ovra d’art singulara.
Sa laschar pender e guardar ils nivels
En questa rimnada da columnas reflectescha Catrina Waldegg davart si’atgna vita sco giuvna dunna e davart la convivenza umana en tut sias fassettas. Igl èn quai texts che pledentan tuttavia betg mo auters giuvenils a la sava tranter adolescenza ed ils emprims pass sin atgnas chommas.
Epocas glazialas en Svizra
René Hantke vala sco in dals pli impurtants perscrutaders dal temp da glatsch en las Alps. En la versiun rumantscha d’in da ses texts – cumparida oriundamain en las ‹Annalas› – descriva Hantke las singulas epocas glazialas en Svizra durant l’ultim temp da glatsch dal quartar.
Or da la vita da Ludmilla Cahenzli
Pertge mangian mammas mandarinas adascus? Pertge dovra la figlia in team da camera per en scola? Pertge èsi normal da cumprar 25 pèra chalzers l’onn? Ludmilla Cahenzli – mamma da trais uffants e dunna cun job parzial – raquinta da las sturnadads dal mintgadi da famiglia.
La tradiziun dal pensar democratic en il Grischun
«Die Form unseres Regiments ist democratisch» – uschia s’exprimivan ils Grischuns gia en il 17avel tschientaner davart lur sistem politic. L’istoricher Georg Jäger dat in sguard in pau pli differenzià al svilup da la democrazia grischuna da las structuras premodernas al stadi modern.
MAGLIACUDESCHS 